Hústaka, innbrot og forvarnir

Hústaka – innbrot – forvarnir. Hústaka er algengari á Spáni en áður og hefur aukist í Covid um meira en 50% frá því sem áður var og er tíðnin núna um 40 eignir á dag. Eignir í eigu útlendinga standa margar auðar mestan hluta ársins og eru því eftirsóttastar af hústökufólki. Samkvæmt spænskum lögum að þá þarf að tilkynna hústöku innan 48 stunda með réttum hætti ef yfirvöld eiga að koma hústökufólkinu út. Eftir þann tíma verða “réttindi” hústökufólksins meiri en eiganda íbúðarinnar. Þessi lög eru alls ekki útlendingavæn og það getur tekið íbúðareiganda sem verður fyrir barðinu á hústökufólki hálft til þrjú ár að ná yfirráðum yfir eign sinni á nýjan leik. Á meðan tikka allir reikningar, skattar og gjöld á eigandanum. Ef hústökufólkið á börn þá flækist málið með enn meiri töfum. Það er því algengt að hústaka fari fram á löngum helgum. Sé t.d. mánudagur frídagur að þá er flutt inn á föstudagskveldi eða laugardegi. Svo virðist vera að bæði lögreglan og eigendur sinni þessum málaflokki síður um helgar. Aðallega vegna þess að lögfræðingur eigandans er í fríi og því ekki hægt að ná í hann. Það eru nokkur atriði sem íslenskir húseigendur geta gert til að minnka líkurnar á hústöku og innbrotum. Forvarnir. Umhirða garðs. Hafirðu garð að þá er best að hafa sem fæstar lifandi plöntur í honum. Séu fjarvistir langar að þá er nauðsynlegt að fá einhvern til að taka upp rusl sem hefur sest að í garðinum og skola eða sópa Calima-rykið sem sest yfir allt. Vökvunarkerfi. Það getur verið gott að kaupa einfalt vökvunarkerfi á krana úti í garði sem t.d. vökvar einu sinni á sólarhring stéttina rétt eins og loftkæling/-hitun sé í gangi. 30 sekúndur gæti veirð nóg seint að kveldi til. Grindverk. Það getur verið gott að skola af grindverkinu, sérstaklega þeirri hlið sem snýr út að götu. Það sama gildir um garðhúsgögn séu þau fyrir hendi. Bifreið. Ef bifreið er innan garðs að þá er gott að skola rykið af henni í leiðinni. Póstkassi. Fullur póstkassi eru skýr merki þess að enginn sé í íbúðinni og því nauðsynlegt að tæma hann reglulega. Ef kemur til hústöku þá getur hústökufólk nýtt sér reikningana til að falsa t.d. leigusamning og fá rafmagn og vatn skrifað á sig. Öryggismyndavél. Öryggismyndavél sem er sjáanleg frá götu hefur fælimátt. Nokkrar tegundir eru til sem láta þig vita í símann sé vart við hreyfingu. Allt eftirlit með umgangi um eign þína er af hinu góða. Þessar myndavélar geta verið með sírenu og hægt að tala í gegnum þær margar. Þær eru til með og án áskriftar. Sólarselluljós í garðinn. Ágætt að hafa nokkur sólarselluljós í garðinum sem kveikja á sér við minnstu hreyfingu. Tímarofar. Gott er að hafa tímarofa sem kveikir á lampa nokkrum sinnum yfir nóttina allar nætur. Birtan frá lampanum þarf að sjást utan íbúðar. Kostur ef hann kveikir ekki alltaf á sama tíma. Það er líka hægt að setja útvarp í samband við tímarofann og best að stilla útvarpið á rás þar sem mikið er talað. Hafa það bara lágt stillt svo nágrannar verði ekki fyrir ónæði af því. Á nóttunni er það hljótt að lágur hljóðstyrkur berst langt. Lyklavöld. Það er nauðsynlegt að hafa einhvern með lyklavöld í nálægð við íbúðina þína. Það þýðir víst lítið að hringja í 112 sértu staddur t.d. á Íslandi og því best að hafa símanúmer þess sem er með lyklana og einnig lögreglu sem er næst íbúðinni til þess að geta látið hana vita af yfirvofandi innbroti og þess háttar. Sértu með lögfræðing að þá þarftu að geta náð í hann um helgar í síma og hann þarf að vera reiðubúinn til að sinna hústöku strax. Ræddu þetta við lögfræðing þinn. Pappírarnir. Það þarf að hafa pappírana klára ef til hústöku kemur. Nýjan rafmagnsreikning, nýjan vatnsreikning, afsal, og skattskýrslu. Öll gögn sem sanna að eigandinn á eignina og notar hana. Það kom áður fram að lögfræðingar eru almennt í fríi um helgar, líka á þeim löngu, þannig að best er að vera með þessi gögn tilbúin í tölvutæku ásamt símanúmeri hans. 48 klukkustundir eru mjög fljótar að líða. Útleiga íbúðar. Eitt besta ráðið til að koma í veg fyrir hústöku er að leigja/lána íbúðina sína út til vina og vandamanna og þar með stytta tímann sem íbúð stendur auð. Fasteignasala/Leigumiðlun. Ef þú færð fasteignasala/leigumiðlun til að selja eða leigja út eignina þína að þá er best að ganga frá því þannig að þessi aðili setji engin skilti upp sem gefa það til kynna að eignin sé til sölu eða leigu. Einnig er mikilvægt að staðsetning eignar sé ónákvæm og að myndir sýni alls ekki staðsetningu hennar.

Kalli á Spáni

Hústaka, innbrot og forvarnir

Um Kalla á Spáni

Færsluflokkar

Hafðu samband

Kalli á Spáni