Alþingiskosningar verða haldnar 25. september 2021. Á þessari síðu er að finna er upplýsingar er varða kosningarnar með áherslu á þá sem eru staddir á Spáni. Það er alveg sama hvar þú ert í heiminum þú átt að geta kosið utan kjörfundar og sent atkvæði þitt í pósti til viðkomandi sýslumanns.
Vegna þess ástands sem ríkir í heiminum vegna Covid-19 farsóttarinnar þá er aðgengi kjósenda að kjörstöðum mismunandi en yfirleitt takmarkað auk þess sem póstþjónustan er tímafrekari. Á Spáni eru 12 ræðismenn og ráðlegast er að setja sig í samband við þann sem næstur er og panta tíma fyrir atkvæðagreiðsluna. Menn þurfa að hafa með sér gild skilríki, t.d. vegabréf. Kosning utan kjörfundar hófst 13. ágúst síðastliðinn.
Hvar er ég á kjörskrá?
Ef þú ert ekki klár á hvaða kjördæmi þú tilheyrir þá geturðu flett því upp hér með því að slá inn kennitöluna á Hvar er ég á kjörskrá?
Sýslumannsembættin
Hér geturðu fundið póstföng sýslumannsembættanna á Íslandi. Ráðlegast er að senda atkvæðið á aðalskrifstofu þess umdæmis sem þú tilheyrir.
Hvaða ræðismaður Íslands er næst mér á Spáni?
Hérna er listi yfir ræðismenn Íslands á Spáni.
Atkvæðagreiðsla utan kjörfundar fer fram á eftirfarandi stöðum:
Innanlands: Hjá sýslumönnum um allt land, á aðalskrifstofum eða í útibúum þeirra. Þá getur sýslumaður einnig ákveðið að atkvæðagreiðsla fari fram á sérstökum kjörstað í umdæminu. Sýslumenn auglýsa hvar og hvenær atkvæðagreiðsla utan kjörfundar getur farið fram. Upplýsingar frá öllum sýslumannsembættum landsins um kjörstaði og afgreiðslutíma vegna atkvæðagreiðslu utan kjörfundar má nálgast á vefsíðu sýslumanna.
Erlendis: Á skrifstofu sendiráðs, í sendiræðisskrifstofu eða hjá kjörræðismanni samkvæmt nánari ákvörðun utanríkisráðuneytisins. Utanríkisráðuneytið getur þó ákveðið að atkvæðagreiðsla utan kjörfundar fari fram á öðrum stöðum erlendis. Utanríkisráðuneytið annast afgreiðslu kjörgagna til kjörstjóra erlendis og auglýsir hvar og hvenær atkvæðagreiðsla geti farið fram. Senda skal atkvæði til sýslumanns eða kjörstjórnar í því umdæmi þar sem kjósandinn telur sig vera á kjörskrá.
- Upplýsingar um sendiskrifstofur á heimasíðu utanríkisráðuneytisins.
- Upplýsingar um kjörræðismenn eftir löndum.
Hvernig fer kosning utan kjörfundar fram?
Kjósandi, sem greiða vill atkvæði utan kjörfundar, skal gera kjörstjóra grein fyrir sér, svo sem með því að framvísa skilríkjum (t.d. ökuskírteini eða vegabréfi) eða á annan fullnægjandi hátt að mati kjörstjóra. Að því búnu fær kjósandi afhent kjörgögn sem eru kjörseðill, kjörseðilsumslag, fylgibréf og sendiumslag.
Á kjörseðli við atkvæðagreiðslu utan kjörfundar eru ekki bókstafir framboðslista, heldur er kjörseðillinn auður. Kjósandi skal aðstoðarlaust og án þess að nokkur annar sjái, rita eða stimpla á kjörseðilinn bókstaf þess framboðslista sem hann vill kjósa.
Eftir að kjósandi hefur ritað atkvæði sitt á kjörseðilinn leggur hann kjörseðilinn í kjörseðilsumslagið og límir það aftur.
Því næst fyllir kjósandi út fylgibréfið og undirritar það í viðurvist kjörstjóra sem vottar atkvæðagreiðsluna.
Kjósandi leggur síðan fylgibréfið og kjörseðilsumslagið í sendiumslagið, límir það aftur og áritar það til sýslumannsins eða kjörstjórnarinnar í því umdæmi þar sem hann telur sig vera á kjörskrá. Loks ritar kjósandi nafn sitt, kennitölu og lögheimili greinilega á bakhlið sendiumslagsins.
Sendiumslagið er þá póstlagt eða komið til sýslumanns í viðeigandi umdæmi eftir öðrum leiðum.
Gangi þér vel!
Þar sem póstur getur borist seint að þá er ráðlegast að senda atkvæði í pósti fyrr en síðar eða eftir öðrum leiðum þegar nær dregur.
